母語日常書寫#8【台羅，呆羅？】

【漢字羅馬字並用書寫（漢羅）】

Chiná民國教育部ê彼套「臺灣『閩南語』羅馬拼音『方案』」簡省叫呆羅（X）「台羅」

伊共白話字「ch」改換做「ts」，我家己讀台羅ê時定定會感覺足困擾，因為本底羅馬字著有「t」佮「th」兩ê字符，教育部呆羅ké-gâu(假gâu，接近華語自作聰明)ê結果着是當咱讀到「T」，可能是t,th,ts,tsh！？

改革應該愈改愈好，結果21世紀Chiná教育部ê呆羅顛倒比200冬前(19世紀末)耶穌會「a-tok-á 阿啄仔」ê白話字Pe̍h-ōe-jī閣較惱？

 

（圖文不符，囥一張相片按呢chiak bōe空空~）

母語日常書寫#7 【Hong-thai 風颱】

（台語白話字 Tâi-gí Pe̍h-ōe-jī）
Pài-la̍k Lé-pài khó-lêng ū chi̍t-ê hong-thai beh lâi Tâi-oàn?

i hō-miâ kiò-chò Mangkhut, Mangkhut sī chi̍t-chióng Thài-kok ê chúi-kó, lán ē-tàng kiò-i "Soaⁿ-tek".

Pún-té nā chiò sūn-sū eng-kai ē hō-miâ kiò "Liû-liân",m̄-ko tī 2006 nî Hong-thai Liû-liân chō-sêng Tang-lâm-a chiâⁿ-tōa ê chai-hāi, só͘-í tio̍h hō͘ "Tû-miâ" kái-ōaⁿ chò kâng-khoán sī Thài-kok ê chúi-kó Mangkhut.

Hó-kî chhâ chi̍t-ē hong-thai, siō͘ⁿ-bē-kàu kèng-jiân ū hong-thai khì hông Tû-miâ ê kò͘-sū neh!

 （Hong-thai beh lâi bô-tāi-bô-chì mài cháu-khì hái-piⁿ-á, chiok hûi-hiám!）
（上圖：風颱欲來無代無誌莫走去海邊á，足危險！）

母語日常書寫#6【Chia̍h 食】

【Tâi-gí Pe̍h-ōe-jī 台語白話字】
(1) Thàu-chá khí Tê--ê-môo-chhiú bé chi̍t-poe Le̍k-tê-gû-ni.
Lim loh kám-kak koài-koài?
Goân-lâi gōa-kháu thong-siông leh bē ê sī Ba̍k-nī-le̍k-tê, kin-á-ji̍t lim--tio̍h Sûn--ê Le̍k-tê tian-tò bē koàn-sì.

(2) Hóe-liông-kó, chi̍t khai-sí sī pe̍h-bah ê, āu-bé chhut-hiān âng-bah ê, tio̍h khah bô khoàⁿ--tio̍h pe̍h-bah Hóe-liông-kó ah.

Kiǎⁿ àm-tǹg chia̍h liáu ê chúi-kó sī pe̍h-bah hóe-liông-kó, chi̍t pōo lo̍h-khì chiah hoat-hiān, ūi-siáⁿ-mi̍h lâng kóng âng-bah ê khah hó-chia̍h?
In-ūi âng-bah Hóe-liông-kí khah sng, i-ê tiⁿ-tō͘ ē pí pe̍h-bah ê khah bêng-hián.